Մեկնարկել է «Մարդու իրավունքները իրական գործերի միջոցով» ամառային դպրոցը

Եվրասիա միջազգային համալսարանի Իրավաբանական կլինիկայի նախաձեռնությամբ մեկնարկել և ընթանում է «Մարդու իրավունքները իրական գործերի միջոցով» խորագրով եռօրյա ամառային դպրոցը՝ նվիրված Մարդու իրավունքների եվրոպական դատարանի (ՄԻԵԴ) գործունեությանը:

Դպրոցի նպատակն է մասնակիցներին ծանոթացնել ՄԻԵԴ կառուցվածքին, ընդունելության չափանիշներին և իրական գործերի քննության մեխանիզմներին՝ տեսական գիտելիքները զուգակցելով գործնական հմտությունների հետ:

Ամառային դպրոցի հագեցած օրակարգը ներառում է ինչպես դասախոսություններ, այնպես էլ ակտիվ գործնական աշխատանքներ․

Մասնակիցներին ողջունեց ԵՄՀ Իրավաբանական կլինիկայի տնօրեն և դասախոս Նունե Ջոմարդյանը: Այնուհետև անդրադարձ կատարվեց անձի իրավական կարգավիճակին (բանախոսներ՝ դասախոս Մերի Շահբազյան և 3-րդ կուրսի ուսանող, կլինիկայի անդամ Մարինա Սահակյան) և իրականացվեց իրավիճակային խնդիրների քննարկում:

Մասնակիցները ուսումնասիրեցին ՄԻԵԴ ընդունելության չափանիշներն ու ուժերը փորձեցին իրավական խորհրդատվության սիմուլացիոն խաղում (համակարգողներ՝ Նունե Ջոմարդյան և 4-րդ կուրսի ուսանող, կլինիկայի անդամ Մանան Առուշանյան):

Երկրորդ փուլում մասնակիցների ուշադրության կենտրոնում Մարդու իրավունքների եվրոպական կոնվենցիայով պաշտպանվող իրավունքներն էին, որոնք ներկայացրեցին կլինիկայի անդամներ, 4-րդ կուրսի ուսանողներ Դիանա Բեջանյանն ու Անուշ Ադամյանը: Կոնվենցիայի 3-րդ հոդվածի՝ Խոշտանգումների արգելքի շուրջ մասնագիտական դասախոսությամբ հանդես եկավ ԵՄՀ դասախոս Էդգար Մանուչարյանը: Այնուհետև ՄԻԵԴ գործունեության վերաբերյալ քննարկումներից հետո (բանախոսներ՝ Ն. Ջոմարդյան, Մ. Առուշանյան) ձևավորվեցին թիմերը և բաշխվեցին դատական գործերը:

Առջևում եզրափակիչ փուլն է, որտեղ թիմերը կանցնեն դատախաղի նախապատրաստական ակտիվ աշխատանքներին: Դպրոցի կարևորագույն ձեռքբերումը կլինի ՄԻԵԴ դատախաղ-սիմուլացիան, որի ընթացքում մասնակիցները հանդես կգան որպես կողմերի իրավապաշտպաններ:

Ամառային դպրոցի ավարտին կամփոփվեն արդյունքները և տեղի կունենա մասնակիցների վկայագրերի հանձնման հանդիսավոր արարողությունը:

#ԵՄՀ#ԻրավաբանականԿլինիկա#ԱմառայինԴպրոց#ՄԻԵԴ#ՄարդուԻրավունքներ