Ս.թ. փետրվարի 23-ին Եվրասիա միջազգային համալսարանը և «Լեգալեքս» ՍՊԸ-ի միջև կնքվեց համագործակցության հուշագիր, որի նպատակն է նպաստել աշխատաշուկայում համալսարանի ուսանողների (շրջանավարտների) մրցունակության բարձրացմանը, մասնակցել բուհի հետազոտական աշխատանքներին:
Հուշագրի շրջանակում «Լեգալեքս» ՍՊԸ-ն կղեկավարի քաղաքացիաիրավական և քրեաիրավական ոլորտներին վերաբերող բակալավրիատի ավարտական աշխատանքները և մագիստրոսական թեզերը, կկազմակերպի իրավագիտության ամբիոնի ուսանողների պրակտիկան:
Հուշագրի հնարավորություն կընձեռի կողմերին համատեղ կազմակերպել գործնական հմտությունների զարգացման արտալսարանային դասընթացներ, դատախաղեր, իրականացնել համատեղ հետազոտություններ, քննարկումներ, մասնակցել իրավաբանական կլինիկայի աշխատանքներին և այլն:
Շնորհավորելով ուսանողներին՝ ԵՄՀ ռեկտոր, աշխ.գիտ.դոկտոր, պրոֆեսոր Սուրեն Օհանյանը նշեց,- «Ներկայիս աշխատաշուկայի պահանջները ցույց տվեցին, որ մասնագիտական կարևոր խնդիր է դառնում գործնական հմտություններին տիրապետելը. բավական չէ ունենալ տեսական գիտելիքներ, անհրաժեշտ է այն զուգակցել գործնական մասնագիտական հմտությունների հետ: Հայտնվելով չնախատեսված իրադրության մեջ՝ ձեր առջև մասնագիտական խնդիրներ են ծառացած լինելու, որոնք կպահանջեն անհապաղ լուծումներ, և այդ ստեղծված իրադրության մեջ դուք պարտավորվելու եք ճիշտ կողմնորոշվելու, իսկ դրա համար անհրաժեշտ է փորձ: Համոզված եմ, որ այս ընկերության հետ կայուն համագործակցությունը տևական արդյունք կտա, և մենք համատեղ մասնակից կլինենք մեր բանիմաց շրջանավարտի պատրաստմանը»:
«Լեգալեքս» ՍՊԸ-ի ներկայացուցիչ-փաստաբան Սմբատ Մինասյանը հավելեց, որ-«Պրակտիկան հնարավորություն կտա ուսումնասիրել խնդիրները, առաջադրել լուծումներ, գործնականում լիարժեք պատկերացում ունենալ փաստաբանի, դատավորի, դատախազի գործառույթների մասին: Լիահույս ենք, որ միասին կիրականացնենք բովանդակալից աշխատանք, որի արդյունքը կլինի մեր բանիմաց շրջանավարտը»:
ԵՄՀ իրավագիտության ամբիոնի վարիչ, իրավագիտության դոկտոր, պրոֆեսոր, ՀՀ վաստակավոր իրավաբան Ռաֆիկ Պետրոսյանը կարևորեց, որ «այլ ընկերությունների հետ ակտիվ կապից բացի իրավագիտության ամբիոնի ուսանողները առնչություն ունենան փաստաբանական ընկերությունների հետ: Եվ այսօր այս հուշագրի կնքումը դրա վառ ապացույցն է: Կարևոր է գիտության և պրակտիկայի միջև պահանջվող կապը, իսկ դրանցից մեկի բացակայության դեպքում առաջընթաց ունենալ չենք կարող: Փաստաբանական այս ընկերության հետ մեր հուշագիրը նպաստելու է նաև, որ ընկերության կողմից կառաջադրվեն կյանքի պահանջներից բխող թեմաներ, և ամբիոնը կազմակերպի այդ թեմատիկայով ավարտական հետազոտական աշխատանքների իրականացումը»:
