Ս.թ. ապրիլի 28-ին ԵՄՀ Օտար լեզուների և գրականության ամբիոնի և Օտար լեզու և գրականություն մագիստրոսական ծրագրի առաջին կուրսի ուսանողների նախաձեռնությամբ կազմակերպվեց առցանց հանդիպում անգլիացի բանաստեղծ Դոկտոր Քամանդ Քոջուրիի հետ` «Քամանդ Քոջուրի. այլության զգացումը կյանքում և գրականության մեջ» թեմայով:
Հանդիպման առաջին մասում բանախոսը ներկայացրեց իր անցած ուղին, առ այն, որ նա ծնվել է Թեհրանում, մանկությունն անցկացրել Դուբայում և Տորոնտոյում, իսկ այժմ բնակվում է Անգլիայում: Նա իր դոկտորական ատենախոսությունը պաշտպանել է ստեղծագործական գրագրությունից Սվանսի համալսարանում, որտեղ այժմ ստեղծագործական գրագրություն է դասավանդում: Քամանդը միևնույն ժամանակ Սվանսի համալսարանի Կին շրջանավարտների Միջազգային դեսպանն է և իր գործունեությամբ խթանում է կանանց ակադեմիական հետազոտություններում ակտիվ ներգրավվածությունը:
Հանդիպման ընթացքում Քամանդն անդրադարձավ իր առաջին գրքին՝ սիրային բանաստեղծությունների հավաքածուին՝ «Հավերժական պարը» վերնագրմամբ, որը լույս է տեսել 2018-ին: Ոգեշնչված մեծ բանաստեղծ Աթարի սիրո յոթ քաղաքներով ՝ գիրքը ուսումնասիրում է սիրո յոթ տարբեր վիճակներ. սիրահարություն, նվիրվածություն, մոլուցք, սրտաճմլիկություն, հմայք, սեր, հասկացողություն և միասնություն:
«Աստված, մարդկությունը գոյություն ունի՞» հեղինակի վերջին բանաստեղծական ժողովածուն է, որտեղ նա քննում է տառապանքի, դիմադրության և հզորացման թեմաները:
Քամանդը գրել է նովել, որն ամբողջությամբ նվիրված է հոլոքոստին. «Իմ նպատակն էր գրել մի պատմություն, որը համաշխարհային հարթակով ցույց կտար, որ փախստականի խնդիրները Սիրիայում միայն Սիրային չէ վերաբերում կամ Մերձավոր Արևելքի փախստականի խնդիր չէ, այլ համամարդկային ճգնաժամ»: Ըստ նրա՝ ՔՈՎԻԴ-19-համաճարակը կարևորագույն դաս էր մարդկության փոխկապվածության: Քամանդը կարծում է, որ լինել լավ, մտածող և գիտակից գրող՝ նշանակում է գրել պատմություն, որը լավագույնս կարտացոլի այսօրվա խնդիրները համաշխարհային մասշտաբով, որը կբարձրաձայնի լռողների ձայնը:
Հարթակի մասնակիցներին բանախոսն առաջարկեց արդյունավետ կարդալու, նովել գրելու հիմնական երեք դրույթները: Նա խորհուրդ տվեց իր ընթերցողներին կարդալու Թոնի Մարիսոնսի «Սիրվածը», ԹրեյսիՇևալյեի «Մարգարտե ականջօղով աղջիկը» և մի քանի այլ ստեղծագործություններ:
Քամանդ Քոջուրին իր ստեղծագործության տպագրության ամբողջ հասույթը տրամադրել է Իրանի մանկական բարեգործական հիմնադրամներին:
Ամփոփելով հանդիպումը՝ հարթակի մասնակիցները բանախոսին ուղղեցին տարաբնույթ հարցեր:
