Այսօր՝ ս․թ․ հոկտեմբերի 23-ին, Եվրասիա միջազգային համալսարանի նախաձեռնությամբ «Մենք այն ենք, «ինչպես» խոսում ենք» թեմայի շրջանակում կազմակերպվեց բանախոսություն- հանդիպում սիրված հաղորդավարուհի և բլոգեր, տաղանդավոր դերասանուհի Նազենի Հովհաննիսյանի հետ։ Հանդիպմանը մասնակցում էին ԵՄՀ և այլ բուհերի ուսանողներ, թեմայով հետաքրքրված անձիք:
Հանդիպման սկզբում բանախոսը լսարանին ուղղված հարց-պատասխանի միջոցով սահմանեց «խոսք» հասկացությունը, այնուհետև անդրադարձավ խոսքի առանձնահատկություններին: Ըստ Նազենիի՝ արդյունավետ հաղորդակցման հիմնական բանալին ճիշտ կառուցված խոսքն է, որի հիմքում ընկած է տոնայնությունը, ձայնի ելևէջները, շնչառությունը, կեցվածքը, ժեստերը և այլն:
«Խոսքին պետք է վերաբերվել հարգանքով: Այն միշտ թվում է դյուրին, բայց իմաստով ու գործողություն դարձող խոսքը շատ բարդ և պատասխանատու մի երևույթ է: Ժամանակակից հաղորդակցման ձևերի շարքին են պատկանում սոցիալական ցանցերը, որտեղ կհանդիպենք ազատ խոսքի արտահայտման տարբեր դրսևորումների: Յուրաքանչյուր նեղ անձնային կարծիք, որն արտահայտվում է սոցցանցերով, դառնում է հանրային, անհատների բազմություն, որոնցից ամեն մեկն էլ իր հերթին իր ձևով կարող է ընկալել այս կամ այն խոսքը: Իսկական խոսքը ծնվում է, ստեղծվում է բազմաթիվ ու հետևողական, մտածված գործողությունների հանրագումարում», -նշեց Նազենին: Նա նաև անդրադարձավ գրավոր և բանավոր խոսքի հիմնական առանձնահատկություններին:
Հանդիպման ողջ ընթացքում Նազենին կարևորեց հայոց լեզվի դերը: Նա կոչ արեց լսարանին խոսել հայերեն և անընդհատ մարզել միտքը:
Հագեցած ու փոխներգործուն մեթոդների կիրառմամբ հանդիպմանը մշտապես ներգրավվում էին ուսանող-կամավորներ:
Հանդիպման ավարտին Եվրասիա միջազգային համալսարանի ռեկտոր, աշխ.գիտ.դոկտոր, պրոֆեսոր Սուրեն Օհանյանը շնորհակալություն հայտնեց Նազենի Հովհաննիսյանին արդյունավետ հանդիպման համար. «Շատ կարևոր էր այսօրվա հանդիպումը ներկայիս երիտասարդության համար: Մենք այսօր լսեցինք բարեհունչ մայրենի լեզուն: Անչափ տպավորված եմ նաև հենց Ձեր գրական հայերեն խոսքով: Մեր լեզուն ճկուն է, գեղեցիկ, ինչն ընդգծվեց Նազենի Հովհաննիսյանի խոսքում»,- նշեց ռեկտորը: Իր հերթին Նազենին ևս շնորհակալություն հայտնեց բուհի ռեկտորին այսօրվա դասն իրեն վստահելու համար:
Թեմայի շրջանակներում հանդիպման մասնակիցները բանախոսին ուղղեցին տարաբնույթ հարցեր:
Հանդիպման նկարները՝ https://photos.app.goo.gl/UhhxvDA3uAh7CPAT9
