Հարգելի՛ ուսանողներ և գործընկերներ,
Հաշված ժամեր անց հրաժեշտ կտանք բազում մարտահրավերներով և ձեռքբերումներով լի 2021 թվականին և նոր հույսերով, պատասխանատվությամբ և շարունակական հաջողությունների սպասումով մուտք կգործենք 2022 թվական։ Ամփոփելով 2021 թվականը՝ ուրախ եմ արձանագրել, որ անկախ երկրի և ամբողջ աշխարհի առջև ծառացած մարտահրավերների, մենք հասել ենք մեր նախանշած ռազմավարական նպատակներին՝ հաջողություններ գրանցելով համալսարանի գործունեության բոլոր հիմնական ուղղություններով։
2021 թվականին գրանցած հաղթանակներին անդրադառնալիս հարկ եմ համարում նշել Եվրասիա միջազգային համալսարանի համակարգմամբ իրականացվող ARMDOCT նախագծի շրջանակներում մշակված «ՀՀ բարձրագույն կրթության երրորդ աստիճանի (ասպիրանտուրա) բարեփոխումների հայեցակարգ»-ի հաստատումը ԿԳՄՍ նախարարի կողմից, որը հիմք է հանդիսանալու երկրում բարձրագույն կրթության երրորդ աստիճանի արմատական վերափոխման։
Անցնող տարում մենք ևս մեկ էական առաջընթաց քայլ ենք կատարել կրթական ծրագրերի կառուցվածքային և բովանդակային վերափոխման, ինչպես նաև միջազգայնացման ուղղությամբ՝ ներդնելով միջազգային համատեղ և կրկնակի դիպլոմի ծրագրեր բարձրագույն կրթության բոլոր մակարդակներում, ապահովելով պրոֆեսորադասախոսական կազմի շարունակական աճն ու կատարելագործումը, մեծացնելով տեղական և միջազգային համագործակցության շրջանակը և այլն։
Սիրելի՛ ուսանողներ, գործընկերներ և ծնողներ, շնորհավորում եմ ձեզ Ամանորի և Սուրբ Ծննդյան տոների կապակցությամբ: Գալիք տարին կարևոր և պատասխանատու է լինելու մեր պետության և ժողովրդի կյանքում. ծրագրերի հստակ իրականացման, աշխատանքների ամբողջացման, աշխատաոճի և մասնագիտական մոտեցումների վերանայման ու կատարելագործման, պատասխանատու որոշումների և հանձնառություների կայացման տարի:
Թող 2022 թվականը մեր երկրի ու ժողովրդի համար լինի խաղաղության, ձեռքբերումների ու նվաճումների տարի, թող բոլորիս օջախներում իշխի սերն ու համերաշխությունը։
Հարգանքով,
ԵՄՀ ռեկտոր, Եվրասիա վարժարանի տնօրեն,
աշխ.գիտ.դոկտոր, պրոֆեսոր Սուրեն Օհանյան
