Այսօր Եվրասիա միջազգային համալսարանը հյուրընկալեց տաղանդավոր երգչուհի, «Ну-ка, все вместе!» մեգանախագծի հաղթող Սյուզաննա Մելքոնյանին: Երգչուհու հետ հարցազրույցը բեմից վարեց ԵՄՀ Լրագրության և մեդիա կառավարման կրթական ծրագրի ղեկավար Տիգրան Հարությունյանը:
Գրագետ հայեցի խոսք, անկեղծ ու ջերմ զրույց իր հանդիսատեսի հետ… այսպիսին էր բացառիկ հանդիպումը սիրված երգչուհու հետ: Համալսարանի ուսանողների և վարժարանի աշակերտների հետ Սյուզաննա Մելքոնյանը կիսվեց իր մասնագիտական ձեռքբերումներով, հաղթահարած խոչընդոտներով և մրցույթներում ամենավառ ու տպավորիչ հուշերով:
«Ну-ка, все вместе!» մեգանախագծին մասնակցելու որոշման մասին հարցին ի պատասխան՝ Սյուզաննան նշեց. «Ես գիտեի, թե ինչ եմ ուզում, ինչու եմ գնացել և ինչպես պետք է անեմ: Առհասարակ, երբ մրցույթների ես մասնակցում, առաջինը, որ մտածում ես՝ հաղթանակն է. դա նորմալ է և բնական: Վստահաբար պետք է նշեմ, որ սա իմ կյանքի միակ մրցույթն էր, որ «եթեներ» ու «գուցեներ» չկային։ Չգիտեմ՝ որտեղից և ինչ կանխազգացմամբ, կյանքում առաջին անգամ հույսս ինձ վրա էի դրել և ամենաշատն ինքս էի ինձ հավատում։ Հստակ ունեի որոշում՝ հաղթանակ»:
Տպավորիչ էր նաև այն, որ դահլիճի ամենահամարձակներից՝ վարժարանի աշակերտ Սուրեն Տուդախլյանը դաշնամուրով կատարեց իր իսկ հեղինակային երգը: Տաղանդաշատ աշակերտը հիացրեց Սյուզաննային:
Հանդիպման մասնակիցները երգչուհուն ուղղեցին տարաբնույթ հարցեր: Ավարտին Սյուզաննան խորհուրդ տվեց՝ հավատալ սեփական ուժերին:
Դե իսկ խմբային լուսանկարը երգչուհու հետ, պարզապես անխուսափելի էր:
