Այսօր՝ ս․թ․հունիսի 17-ին, Եվրասիա միջազգային համալսարանը հյուրընկալեց Հայաստանում Իրաքի Հանրապետության Արտակարգ և լիազոր դեսպան, Ն.Գ. տիկին Ալիա Մահմուդ Սալմանին։ Դեսպանին բուհում առաջինը դիմավորեցին ԵՄՀ հիմնադիրների խորհրդի նախագահ, Սթոնհիլ համալսարանի պրոֆեսոր Աննա Օհանյանը և ԵՄՀ ռեկտոր, աշխ․գիտ․դոկտոր, պրոֆեսոր Սուրեն Օհանյանը։ Հանդիպման ընթացքում պրոֆեսորները դեսպանի հետ միասին քննարկեցին երկու պետությունների՝ Հայաստանի և Իրաքի 
բարձրագույն կրթական համակարգերի առանձնահատկություններն ու առկա հիմնախնդիրները և վերջիններիս համապատասխանելիությունը ժամանակակից աշխատաշուկայի պահանջներին: Իր հերթին դեսպան Ալիա Մահմուդ Սալմանին շնորհակալություն հայտնեց բուհից՝ ի դեմս ռեկտորի և աշխատակազմի, ուսանողների մասնագիտական 
կրթությունը լավագույնս կազմակերպելու, ուսանողների նկատմամբ ցուցաբերած ուշադրության համար, և համոզմունք հայտնեց, որ նոր մասնագիտական առարկաների ավելացմանը զուգընթաց կձևավորվեն համապատասխան բարձրակարգ տեխնիկայով զինված նորանոր լաբորատորիաներ։
Այցի շրջանակում Արտակարգ և լիազոր դեսպան Ն.Գ. տիկին Ալիա Մահմուդ Սալմանը հանդիպեց ԵՄՀ ուսանողներին, որի ընթացքում ուսանողները դեսպանին ուղղեցին տարաբնույթ հարցեր և ստացան սպառիչ պատասխաններ։
Դեսպանի հետ հանդիպումն ավարտվեց բուհում շրջայցով։
