Եվրասիա միջազգային համալսարանում կայացավ բակալավրատի և մագիստրատուրայի դիպլոմների հանձնման արարողությունը։ Չնայած առօրյան անսովոր էր, համավարակով պայմանավորված, այդուհանդերձ առիթն ամենասպասվածն ու նշանակալիցն էր։ Եվրասիա միջազգային համալսարանն այս տարի նույնպես նոր ուղեգիր էր տալիս բազմաթիվ շրջանավարտների բակալավրիատից և մագիստրատուրայից:
Միջոցառման շրջանավարտներին առաջինը շնորհավորեց ԵՄՀ ռեկտոր, աշխ. գիտ. դոկտոր, պրոֆեսոր Սուրեն Օհանյանը,- «Շնորհակալ եմ ձեզ, որ մեզ վստահեցիք ձեր կրթությունը: Մենք միասին կարևոր ճանապարհ անցանք՝ հաղթահարելով տարատեսակ մարտահրավերներ՝ հատկապես վերջին շրջանում, այդուհանդերձ համոզված եմ, որ ձեռք բերեցիք ամենաարժեքավորը՝ ժամանակակից գիտելիք և հմտություն ներկայիս աշխատաշուկայի պահանջներին համապատասխան: Մաղթում եմ բոլորիդ կանաչ ճանապարհ և հաղթանակներ կյանքի այս նոր շրջափուլում»։
Շրջանավարտներին ողջույնի խոսքեր ուղղեցին Ուսումնամեթոդական աշխատանքների գծով պրոռեկտոր Իրինա Բաբայանը, իրավագիտության ամբիոնի վարիչ Ռաֆիկ Պետրոսյանը, կառավարման ամբիոնի վարիչ Աննա Մարտիրոսյանը, օտար լեզուների և գրականության ամբիոնի վարիչ Հայկուհի Մուրադյանը, որոնց էլ վստահված էր դիպլոմների հանձնումը։
Հավելենք նաև, որ այսօր բակալավրիատի բազմաթիվ շրջանավարտներ ցանկություն են հայտնել ուսումնառությունը շարունակելու համալսարանի մագիստրոսական կրթական ծրագրերում:
