2016թ. հունիսի 24-ին Եվրասիա միջազգային համալսարանում մեկնարկեց «Համաշխարհային խաղաղության տեղական արմատները» թեմայով երկօրյա գիտաժողովը: Վերջինս կազմակերպվել է Սթոնհիլ քոլեջի (Մասաչուսեթս, ԱՄՆ), Եվրասիա համագործակցություն հիմնադրամի (Հայաստան) և Եվրասիա միջազգային համալսարանի ջանքերով:
Միջազգային գիտաժողովի նպատակն է կատարել հակասական և գրեթե անհամատեղելի միտումների վերաբերյալ վերլուծություններ ու բացահայտումներ, ստեղծել երկխոսություն քաղաքական նույն խնդիրը միավորող երկրների միջև:
Բացման խոսքով հանդես եկավ ԱՄՆ-ի Սթոնհիլ քոլեջի քաղաքագիտության և միջազգային հետազոտությունների ամբիոնի վարիչ, պրոֆեսոր Աննա Օհանյանը: Բանախոսը ներկայացրեց թեմայի, խնդրի կարևորությունը և գիտաժողովի անհրաժեշտությունը տարածաշրջանում:
Խոսքի ավարտին Աննա Օհանյանն իր երախտագիտությունը հայտնեց կազմակերպիչներին, ներգրավված կամավորներին, անհատներին և կազմակերպություններին, որոնց շնորհիվ կայացավ գիտաժողովը և կամուրջ ստեղծվեց համաշխարհային, ներպետական կարևոր խնդիրների քննարկման համար:
Ելույթով հանդես եկավ նաև ԵՄ պատվիրակության նախագահ, դեսպան Պյոտր Անտոնի Սվիտալսկին, ով անդրադարձավ խնդրի կարևորությանն ու բարձրաձայնմանը հատկապես Հայաստանում, հնարավոր արդյունավետ և համամարդկային ուղիների որոնմանը քաղաքական խաչմերուկներում, միջազգային լսարաններում: Ըստ դեսպանի` համաշխարհային քաղաքականության մակարդակով արդեն նկատելի է դրական ակնառու փոփոխությունների միտում: Գլոբալացված աշխարհն ավելի խաղաղ և միաժամանակ ավելի անհանգիստ է դարձել: Սառը պատերազմի ավարտը հակամարտության և համագործակցության նոր տարատեսակներ ի հայտ բերեց` արմատավորված հանցագործություններ և վերազգային արձագանքներ: Միջպետական պատերազմների կտրուկ նվազումը, առավել անկանոն դրսևորվող քաղաքական պատերազմների քանակական նվազումն ամբողջ աշխարհով մեկ խրախուսվող միտում է համարվում: Այնուամենայնիվ, դեռևս մոլեգնում են մարդասիրական ճգնաժամերը, ինչպես օրնակ սիրիական քաղաքացիական պատերազմը:
ԱՄՆ Մարթին ինստիտուտի տնօրեն, Սթոնհիլ քոլեջի պրոֆեսոր Փիթեր Ուբերտասսիոն նույնպես շնորհակալություն հայտնեց գիտաժողովի կազմակերպիչներին` լիահույս լինելով, որ այն դեպի խաղաղասիրություն տանող լայնահուն ճանապարհ կհանդիսանա համաշխարհային քաղաքական կոնֆլիկտների հաշտեցման առումով: Նա ուրախ է Սթոնհիլ քոլեջի ուսանողներին ընձեռված հնարավորության համար, ովքեր իրենց ծավալուն հետազոտություններն են իրականացրել Հայաստանի Հանրապետությունում` ուսումնասիրելով երկիրը ոչ միայն քաղաքական տեսանկյունից, այլև մշակութային:
Եվրասիա միջազգային համալսարանի ռեկտոր, պրոֆեսոր պարոն Սուրեն Օհանյանը նշեց միջոցառման կարևորությունը ԵՄՀ հետազոտական ներուժի զարգացման առումով, ինչը կարևորվել է համալսարանի վերահավատարմագրման գործընթացի ժամանակ։ Ըստ Սուրեն Օհանյանի, նման գլոբալ նախաձեռնությունները, անշուշտ, իրենց անդրադարձը կունենան կրթության կազմակերպման գործում:
Թեմայի շուրջ իր կարևոր դիտարկումն արեց Եվրասիա համագործակցություն հիմնադրամի գլխավոր տնօրեն Գևորգ Տեր-Գաբրիելյանը, ով մասնավորապես նշեց. «Եվրասիա համագործակցություն հիմնադրամը մտածող և գործող կազմակերպություն է, դա ձևակերպումներից մեկն է, որով ինքներս մեզ նկարագրում ենք։ Լավ գործելու համար պետք է խորը մտածել: Ուրախ եմ, որ այս երկու օրը տրամադրված կլինի հենց մտածելուն»:
