Կարևորելով փաստաբանական ինստիտուտի դերը և նշանակությունը մարդու իրավունքների պաշտպանության ոլորտում՝ «Եվրասիա» ավագ դպրոցի հումանիտար հոսքի «Իրավագիտություն» ենթահոսքի աշակերտները «Արդարադատության համակարգը Հայաստանի Հանրապետությունում» առարկայի շրջանակներում ճանաչողական այցով հյուրընկալվել էին ՀՀ փաստաբանների պալատում:
Աշակերտներին ողջունել և հյուրընկալել են Փաստաբանական ակադեմիայի ռեկտոր Արա Զոհրաբյանը և գիտագործնական գծով պրոռեկտոր Մանե Կարապետյանը, ՀՀ փաստաբանների պալատի աշխատակազմի ղեկավար Լուսինե Սարգսյանը և այլք։
Աշակերտների հետ զրույցում Փաստաբանների պալատի աշխատակազմի ղեկավարը ներկայացրել է փաստաբանի դերն արդարադատության համակարգում, փաստաբանի գործառույթները և գործունեության առանձնահատկությունները, ինչպես նաև պատասխանել այցելուներին հետաքրքրող հարցերին:
Ճանաչողական այցի շրջանակներում Լուսինե Սարգսյանի ուղեկցությամբ աշակերտները շրջել են Փաստաբանների պալատի վարչական շենքի տարածքում, ծանոթացել աշխատանքային ընթացքին, փաստաբանների պալատի գործառույթներին ու կառուցվածքին:
Այնուհետև աշակերտներն այցելել են Փաստաբանական ակադեմիա:
Նրանց ողջունել և հյուրընկալել են Փաստաբանական ակադեմիայի ռեկտոր Արա Զոհրաբյանը և գիտագործնական գծով պրոռեկտոր Մանե Կարապետյանը:
Փաստաբանական ակադեմիայի ռեկտորն աշակերտներին ներկայացրել է Փաստաբանական ակադեմիայի դերն ու կարևորությունը, փաստաբան դառնալու ընթացակարգը և պայմանները, ապա հաջողություն մաղթել փաստաբան դառնալու ցանկություն ունեցող ապագա իրավաբաններին:
Աշակերտները ճանաչողական այցն ամփոփել են Հանրային պաշտպանի գրասենյակում:
Այստեղ նրանց ողջունել է Հանրային պաշտպանի գրասենյակի ղեկավարի տեղակալ Թամարա Բաղդասարյանը: Նա ներկայացրել է հանրային պաշտպանների կարևորությունը և անմիջականորեն ծանոթացրել հանրային պաշտպանների աշխատանքային պայմաններին:
Հանդիպման ավարտին աշակերտները կիսվել են տպավորություններով և շնորհակալություն հայտնել ընդունելության համար:
