ԵՄՀ Հետազոտական կենտրոնի նախաձեռնությամբ անցկացվեց «Հետազոտական դրամաշնորհներ. հայտերի գրագետ ներկայացման ձևաչափը և հաջողության բանաձևը» սեմինարը: Այն միավորեց համալսարանի դասախոսներին և հետազոտողներին՝ քննարկելու գիտական դրամաշնորհների հայտերի պատրաստման արդյունավետ մոտեցումները և գործնական հմտությունները։
Սեմինարը վարեց ԵՄՀ Ֆարմացիայի ամբիոնի դասախոս, ք. գ. թ., և ՀՀ ԳԱԱ ՕԴՔ ԳՏԿ առաջատար գիտաշխատող Շուշանիկ Դաշյանը։ Բանախոսի հարուստ գիտական ու կիրառական փորձը թույլ տվեց թեման ներկայացնել հստակ, մատչելի և օգտակար եղնակով. ինչպես կառուցել համոզիչ և պրոֆեսիոնալ հայտ միջազգային և տեղական դրամաշնորհային ծրագրերի համար, ներառյալ Horizon Europe և ՀՀ ԿԳՄՍՆ Գիտության կոմիտեի մրցույթները։
Քննարկվեցին հետազոտական գաղափարի ձևակերպման, նախագծի կառուցվածքի, նպատակների հստակ սահմանման, համապարփակ պլանավորման և բյուջետավորման հիմնական մոտեցումները։ Առանձնահատուկ ուշադրություն դարձվեց տարածված սխալներին և դրանցից խուսափելու գործնական լուծումներին։
Սեմինարը դարձավ օգտակար հարթակ՝ մասնակիցներին հնարավորություն տալով զարգացնելու իրենց հետազոտական նախագծերի մշակման ու հայտերի պատրաստման հմտությունները և բարելավելու մրցունակությունը միջազգային ու տեղական դրամաշնորհների համար։
